ಜಪಾನೀಸ್ ಎನ್ಸೆಫಲೈಟಿಸ್ ರೋಗ ಮತ್ತು ಲಸಿಕೆ

ಜಪಾನೀಸ್ ಎನ್ಸೆಫಲೈಟಿಸ್ ಎಂಬುದು ಒಂದು ವೈರಾಣುವಿನ ಸೋಂಕಾಗಿದ್ದು ಇದು ಫ್ಲಾವಿವೈರಸ್ ನಿಂದ ಉಂಟಾಗುತ್ತದೆ. ಇದು ವೈರಾಣುವಿನಿಂದ ಸೋಂಕುಗೊಂಡ ಸೊಳ್ಳೆಯ ಕಡಿತದಿಂದ ಹರಡುತ್ತದೆ. ಈ ಸೋಂಕಿನ ಪ್ರಾಥಮಿಕ ಮೂಲವು ಫ್ಲಾವಿ ವೈರಸ್ ಹೊಂದಿರುವ ಹಂದಿಗಳು ಮತ್ತು ಪಕ್ಷಿಗಳಾಗಿದ್ದು, ಇದು ನಂತರ ಸೋಂಕಿತ ಪ್ರಾಣಿ ಅಥವಾ ಪಕ್ಷಿಯ ರಕ್ತವನ್ನು ಹೀರುವ ಸೊಳ್ಳೆಗೆ ವರ್ಗಾವಣೆಯಾಗುತ್ತದೆ. ಈ ರೋಗದ ತೀವ್ರ ಸ್ವರೂಪಗಳಲ್ಲಿ ಮೆದುಳಿನಲ್ಲಿ ಊತ ಅಥವಾ ಹಾನಿ ಉಂಟಾಗಿ ಶಾಶ್ವತ ಮೆದುಳು ಹಾನಿಗೆ ಕಾರಣವಾಗುತ್ತದೆ. ವೈರಾಣುವನ್ನು ಹೊಂದಿರುವ ಸೊಳ್ಳೆಗಳು ಕೆಸರು ಪ್ರದೇಶಗಳಲ್ಲಿ, ಹಂದಿ ಕೊಟ್ಟಿಗೆಗಳು ಮತ್ತು ಭತ್ತದ ಹೊಲಗಳನ್ನು ಒಳಗೊಂಡಂತೆ ಗ್ರಾಮೀಣ ಮತ್ತು ನಗರದ ಎರಡೂ ಉಷ್ಣವಲಯ ಪ್ರದೇಶಗಳಲ್ಲಿ ಸಂತಾನೋತ್ಪತ್ತಿ ಮಾಡುತ್ತವೆ.

ಈ ವೈರಾಣು ಮಾನವನ ಸಂಪರ್ಕದಿಂದಾಗಲೀ ಅಥವಾ ಆಹಾರ ಅಥವಾ ಪಾನೀಯಗಳನ್ನು ಹಂಚಿಕೊಳ್ಳುವುದರಿಂದ ಒಬ್ಬರಿಂದ ಮತ್ತೊಬ್ಬರಿಗೆ ಹರಡುವುದಿಲ್ಲ.

ಕಾಯಿಲೆ ಬಂದ ಅನೇಕರಿಗೆ ಯಾವುದೇ ಲಕ್ಷಣಗಳು ಕಂಡುಬರುವುದಿಲ್ಲ ಅಥವಾ ಕಂಡರೂ ವಾಂತಿ ಅಥವಾ ವಾಕರಿಕೆ ರೀತಿಯ ಬಹಳ ಸೌಮ್ಯ ಸ್ವರೂಪದ್ದಾಗಿರುತ್ತದೆ. ಲಕ್ಷಣಗಳನ್ನು ಸಾಮಾನ್ಯವಾಗಿ ಫ್ಲೂ ಎಂದು ತಪ್ಪಾಗಿ ಅರ್ಥೈಸಲಾಗುತ್ತದೆ.

ಅದಾಗಿಯೂ, ಜಪಾನೀಸ್ ಎನ್ಸೆಫಲೈಟಿಸ್ ನಿಂದ ಬಳಲುತ್ತಿರುವ ಒಂದು ಸಣ್ಣ ಭಾಗದಷ್ಟು ಜನರು ಗಂಭೀರ ಸಮಸ್ಯೆಗಳನ್ನು ಅನುಭವಿಸುತ್ತಾರೆ ಮತ್ತು ಸೋಂಕು ಮೆದುಳಿಗೆ ಹರಡುತ್ತದೆ. ಬಹಳ ಅಪರೂಪವಾಗಿ, ತೀವ್ರ ಸ್ವರೂಪದ ಸೋಂಕಿನಲ್ಲಿ ಈ ಕೆಳಗಿನ ಲಕ್ಷಣಗಳನ್ನು ಅನುಭವಿಸುತ್ತಾರೆ:

• ಮೆದುಳಿನಲ್ಲಿ ಊತ
• ಅತ್ಯಧಿಕ ಜ್ವರ
• ಮೂರ್ಛೆ
• ದಿಗ್ಭ್ರಮೆ
• ಪಾರ್ಶ್ವವಾಯು ಅಥವಾ ನಡುಕ

ಒಂದುವೇಳೆ ಸೋಂಕು ಗಂಭೀರವಾಗಿದ್ದು, ರೋಗಿಯು ಬದುಕುಳಿದರೆ ಅವರ ಮೆದುಳಿಗೆ ಶಾಶ್ವತ ಹಾನಿಯಾಗುತ್ತದೆ, ಒಂದು ಅಥವಾ ಎರಡು ಕೈಕಾಲುಗಳಲ್ಲಿ ಪಾರ್ಶ್ವವಾಯು, ದುರ್ಬಲ ಸ್ನಾಯುಗಳು, ಸೆಳೆತ ಇತ್ಯಾದಿ ಸಮಸ್ಯೆಗಳನ್ನು ಅನುಭವಿಸುತ್ತಾರೆ

ಸಾಮಾನ್ಯವಾಗಿ ಜಪಾನೀಸ್ ಎನ್ಸೆಫಲೈಟಿಸ್ ಲಸಿಕೆಯನ್ನು 2 ತಿಂಗಳುಗಳಿಗಿಂತ ಮೇಲ್ಪಟ್ಟ ಮಕ್ಕಳಲ್ಲಿ ನೀಡಲು ಶಿಫಾರಸ್ಸು ಮಾಡಲಾಗುತ್ತದೆ.

ಅದಾಗಿಯೂ, ಹೆಚ್ಚಿನ ಮಾಹಿತಿಗಾಗಿ ನಿಮ್ಮ ವೈದ್ಯರನ್ನು ಒಮ್ಮೆ ಭೇಟಿ ಮಾಡಿ.

ಲಸಿಕೆ ಪಡೆದ ವ್ಯಕ್ತಿಯು ಸೌಮ್ಯ ಮತ್ತು ಅಲ್ಪಾವಧಿ ಅಡ್ಡಪರಿಣಾಮಗಳನ್ನು ಅನುಭವಿಸುತ್ತಾರೆ. ಅವುಗಳೆಂದರೆ:

• ಚುಚ್ಚುಮದ್ದು ನೀಡಿದ ಜಾಗದಲ್ಲಿ ನೋವು, ಊತ ಅಥವಾ ಚರ್ಮ ಕೆಂಪಾಗುವುದು
• ಸ್ನಾಯು ನೋವು
• ತಲೆ ನೋವು

ಒಂದುವೇಳೆ ಅಡ್ಡ ಪರಿಣಾಮಗಳು ಮುಂದುವರೆದಲ್ಲಿ, ದಯವಿಟ್ಟು ನಿಮ್ಮ ವೈದ್ಯರನ್ನು ಭೇಟಿ ಮಾಡಿ.